ಒಂದು ಹಾಡು ನಮ್ಮ ನೆಚ್ಚಿನ ಹಾಡುಗಳ ಸಾಲಿಗೆ ಸೇರೋದು ಯಾವಾಗ? ನಮ್ಮ ಫೇವರಿಟ್ ಆಗೋದು ಯಾವಾಗ? ಬಹುಶ ಆ ಹಾಡಿನ ಯಾವುದೋ ಒಂದು ಸಾಲು ನಮ್ಮನ್ನು ಆವರಿಸಿಕೊಂಡಂತೆ, ಹಾಡಿದವರ ಕಂಠದಲ್ಲಿ ಭಾವನೆಗಳು ಸರಾಗವಾಗಿ ಹರಿದಂತೆ, ಹಾಡಿನ ರಾಗ ಜೀವನದ ಯಾವುದೋ ಘಳಿಗೆಯನ್ನು ಸಂಯೋಜಿಸಿದಂತೆ, ಅದರ ಲಯ ಹೃದಯದ ಮೂಲೆಯಲ್ಲೆಲ್ಲೋ ಸಿಂಚನವಾದಂತೆ ಇರಬಹುದು. ಹೀಗೆ ಆವರಿಸಿಕೊಂಡು ಇಷ್ಟವಾದ ಹಾಡೊಂದನ್ನು ಆಗಷ್ಟೇ FM ನಲ್ಲಿ ಕೇಳಿಕೊಂಡು ಆಟೋ ಹತ್ತಿ ಆಫೀಸಿಗೆ ಹೊರಟೆ. ಆಗಷ್ಟೇ ಹೊಸದಾಗಿ ಬಿಡುಗಡೆ ಆದ ಕನ್ನಡ ಚಿತ್ರದ ಈ ಇ೦ಪಾದ ಹಾಡು ತುಂಬಾ ಇಷ್ಟವಾಗಿ ಹೋಗಿದೆ. ಅರೆ, ಇದೇನಿದು! ಈ ಹಾಡಿನ ನಡುವೆ ನನ್ನ ಕಂಪನಿಯ CEO ಕರೆ! ಇವರ ಮುಂದೆ ನಿಂತು ಎದುರ ಮಾತನಾಡುವ ವ್ಯಕ್ತಿಯನ್ನು ಇದುವರೆಗೂ ನಾನಂತೂ ಕಂಡಿಲ್ಲ. ಈಗ ಅವರ ಈ ಕರೆ! ಮಾತನಾಡಲು ಹೊರಟರೆ ಹಾಡಿನ ಪದಗಳು - ಸಾಹಿತ್ಯ - ಹಾಡನ್ನು ಕೇಳುವ ಸಂಭ್ರಮ ಎಲ್ಲವೂ ಸಧ್ಯಕ್ಕೆ ಮುಗಿದೇ ಹೋಗುವುದ೦ತು ನಿಶ್ಚಿತ. ಮಾಲೀಕರ ಈ ಕರೆಯನ್ನು ನಿರಾಕರಿಸಿದರೆ ಹೇಗೆ? ಆ ಅರೆ ಘಳಿಗೆ ಮನಸು ನಿರಾಕರಿಸುವಂತೆ ಸೂಚಿಸಿದೆ, ಆದರೆ ಈ ಸೂಚನೆಗೆ ಮುಂಚೆಯೇ ಕರೆ ನಿರಾಕರಿಸಿ ಆಗಿದೆ. ಹಾಡು ಸಂಪೂರ್ಣವಾಗಿ ಕೇಳಿದ ನಂತರ ತಕ್ಷಣವೇ ಕರೆ ಮಾಡಿ ಮಾತನಾಡಿದೆ.
ಇವರ ಕರೆ ನಿರಾಕರಿಸುವಷ್ಟು ಪ್ರಭಾವ ಈ ಹಾಡಿಗೆದೆಯೇ? ಪ್ರಾಮಾಣಿಕತೆಯಿಂದ ಮಾಡುವ ಕೆಲಸವೇನೋ ಸರಿ! ನಡುವೆ ಹಾಡು ಕೇಳುವುದೂ ಸಹ ಒ೦ದು ಸಣ್ಣ ಸಂಭ್ರಮ. ಕರೆ ನಿರಾಕರಿಸಿದ ಘಳಿಗೆ - 'ಪರಪಂಚ' ಮುಳುಗಿ ಹೋಗಲಿಲ್ಲ - ಕೆಲಸ, ಕಂಪನಿ, ಎಲ್ಲವೂ ಅದರದರ ಸ್ಥಾನಗಳಲ್ಲಿ ಹಾಗೆಯೇ ಇವೆ. ನನ್ನ ಈ ಸ್ವಾರ್ಥ, ಈ ಧೈರ್ಯ, ಈ ವರ್ತನೆ ಎಷ್ಟು ಸಮ೦ಜಸವೋ ತಿಳಿಯುತ್ತಿಲ್ಲ! ಸಾಂತ್ವನ ಹೇಳುವಂತೆಯೋ - ಗೇಲಿಮಾಡಿದ೦ತೆಯೋ ಸೂರ್ಯ ಅಲ್ಲಿಂದಲೇ ನನ್ನೆಡೆ ನೋಡಿ ಸಣ್ಣದೊಂದು ಎಳೆ ಬಿಸಿಲಿನ ನಗೆ ರವಾನಿಸಿದ್ದ. ಇವುಗಳ ನಡುವೆ ಅದೇ ಹಾಡಿನ ಸಾಲೊಂದು ಮತ್ತೆ ನೆನಪಾಯಿತು. ಇಷ್ಟಕ್ಕೂ ಸಣ್ಣ ಸಣ್ಣ ವಿಚಾರಗಳಲ್ಲಿ ಅಡಗಿರುವ ಸಂಭ್ರಮದ ಒಡನಾಟ - ಹುಡುಕಾಟ ಇಂದಿಗೂ ಜಾರಿಯಲ್ಲಿದೆ.
3K - ಪ್ರೇಮ ಕವನಗಳ ಕಾಶಿ
ಹೀಗೆ ಈ ಕವನಗಳನ್ನು ಓದುವಾಗ ಹೀಗೊಂದು ಸಂಗತಿ ಗಮನಿಸಿದೆ! ಪ್ರೇಮ ಕವನಗಳನ್ನು ಹುಡುಗ ಹುಡುಗಿಯರೂ (ಕವಿಗಳು) ಇಬ್ಬರೂ ಬರೆಯುತಿದ್ದಾರೆ. ಇಬ್ಬರ ಪ್ರೇಮ ಕವನಗಳಲ್ಲೂ ಮೂಡಿಬರುತಿರುವ ವಸ್ತು,
- ಸಂಗಾತಿ ಹೀಗಿರಬೇಕು
- ಭಗ್ನ ಪ್ರೇಮ / ವ೦ಚನೆ
- ಮೋಸಹೋದ ಹೃದಯ
- ಕಾಡುವ ಪ್ರೇಮಿ
- ಜೊತೆಯಲ್ಲಿ ಕಳೆದ ದಿನಗಳು
- ಆಣೆ : ಭಾಷೆ
- ಅವಳ ಸೌಂದರ್ಯ / ಅವನ ಗುಣಗಾನ
- ಗಾಯಗೊಂಡ ಪ್ರೀತಿ
- ಕಳೆದುಹೋದ ಹುಡುಗ / ಹುಡುಗಿ
ನಿಧಾನವಾಗಿ ಒಬೊಬ್ಬರ ಪರಿಚಯಗಳು ನಡೆಯುತ್ತಿವೆ. ಅರೆ! ಈ ಹುಡುಗರು ಎಷ್ಟು ಬೇಗ ಪರಿಚಿತರಾಗಿಬಿಡ್ತಾರೆ. ಎಷ್ಟೋ ವರ್ಷಗಳ ನ೦ಟಸ್ತಿಕೆ ಇರುವ ಹಾಗೆ ಒಬ್ಬೊಬ್ಬರನ್ನು ಅವರು ಕರೆದುಕೊಳ್ಳುತಿರುವ ಹೆಸರುಗಳು : ಗುರುವೇ, ಶಿವ, ಮಚ್ಚಿ, ತಂದೆ, ಮಗ, ಮಾಮ etc., ಹೀಗೆ. (ಚೆರ್ರಿ ಚರಣ್ ಹಾಗು ಕ್ವಿಕಿ ಅರುಣ್ ಇನ್ನಷ್ಟು ಪದಗಳನ್ನು ಹೇಳಿಕೊಟ್ಟಿದ್ದಾರೆ, ಯಾವ ಶಬ್ದಕೋಶ - ಪದಕೋಶ - ಅರ್ಥಕೋಶ - ನಿಘಂಟುಗಳನ್ನೆಲ್ಲಾ ಹುಡುಕಿದರೂ ಆ ಪದಗಳಿಗರ್ಥ ಸಿಗಲಾರದು). ಈ ಹರಟೆಕಟ್ಟೆ ತಮಾಷೆಯಾಗಿದೆ, ಕವನಗಳ ಹೊರತು ಬೇರೆಲ್ಲ ವಿಷಯಗಳು ಈ ಕಟ್ಟೆಯಲ್ಲಿ ಮಾತನಾಡಬಹುದು.
ಏನೇ ಆಗಲಿ ಹರಟೆಕಟ್ಟೆಯಿಂದಾಗಿ 3K ಎಂದರೆ ಎಲ್ಲರಿಗೂ ಪ್ರೀತಿ ಮೂಡಿಸುವಂತಾಗುತಿದೆ. ನವೀನನಿಗೊಂದು ಪ್ರೀತಿಯ ಧನ್ಯವಾದ. ಈಗಷ್ಟೇ ಈ ರೈಲು ಬಂಡಿ ಹೊಸದೊಂದು ತಿರುವು ಪಡೆಯಲು ಮುಂದಾಗುತಿದೆ.......................